Баркалабаўская сельская бібліятэка
Да вайны бібліятэкі ў вёсцы не было. Толькі пасля вайны ў памяшканні сельскага Савета была адкрыта хата-чытальня. Першым яе загадчыкам працаваў Руднікаў Іван Данілавіч - ураджэнец вёскі Касічы. Жыццё пасля вайны было вельмі цяжкае, але людзі з ахвотай пацягнуліся да кнігі. І.Д. Руднікаў працаваў да 1959 года. У гэтым жа годзе было пабудавана памяшканне сельскага клуба і загадчыкам клуба і бібліятэкі стаў працаваць Цыркуноў Трафім Аляксандравіч.
З 1963 года па 1966 год загадчыкам працаваў Церашкоў Дзмітрый Захаравіч. У 1966 годзе абавязкі прыняла Краўчанка Еўдакія Кліменцьеўна.
З 1 студзеня 1968 года бібліятэка была адасоблена ад клуба. Загадчыцай бібліятэкі стала працаваць Зінкавец Людміла Паўлаўна. Яна працавала да 1 верасня 1970 года. Далейшы працоўны шлях яна працягвала ў школе. Спачатку працавала настаўніцай, потым намеснікам дырэктара па вучэбна-выхаваўчай рабоце, а затым і дырэктарам школы.
Пазней бібліятэка пераехала ў памяшканне калгаснай канторы. Цяпер гэтага будынка не існуе, ён быў знесены ў 2006 годзе. Зараз на гэтым месцы знаходзіцца комплексны прыёмны пункт.
З 1 верасня 1970 года ў бібліятэцы стала працаваць Ялфімава Святлана. У снежні 1974 года адкрыўся Баркалабаўскі сельскі Дом культуры і бібліятэка пераехала ў новае памяшканне Дома культуры. Яна стала занімаць большы пакой на другім паверсе. Бібліятэкарам у гэты час працавала Захарава Галіна Іванаўна.
Пасля Захаравай Галіны Іванаўны бібліятэку прыняла Каманская Наталля. У 1978 годзе яна выйшла замуж і змяніла месца жыхарства.
У 1978 годзе ў бібліятэку прыйшла працаваць Шляхценка Галіна Паўлаўна. Яна працавала да 1987 года.
Мажанкова Наталля Станіславаўна замяняла дэкрэтны адпачынак Г.П. Шляхценка з жніўня 1983 па жнівень 1984 года. Пасля Г.П. Шляхценка бібліятэчныя работнікі змяняліся кожны год:
Лежань Вольга Іванаўна (жнівень 1987 г.- жнівень 1988 г.).
Талкачова Святлана Іванаўна (жнівень 1989 г. – чэрвень 1990 г.).
Бенедык Алена Сямёнаўна (ліпень 1990 г. – ліпень 1991 г.).
З ліпеня 1991 года і па цяперашні час бібліятэкарам Баркалабаўскай сельскай бібліятэкі працуе Чухманава Святлана Васільеўна.