У рамках клуба па інтарэсах «Золотой возраст» у цэнтральнай раённай бібліятэцы імя Б.В. Стральцова прайшло фальклорнае свята, прысвечанае масленічнаму тыдню «Масленіца ідзе, за сабой вясну вядзе».

---

На аформленай да мерапрыемства кніжнай выставе «Спадчына маёй зямлі» былі прадстаўлены кнігі, звязаныя з беларускімі традыцыямі, фальклорам і кухняй у кантэксце Масленіцы.

Гасцей пазнаёмілі з гісторыяй свята і традыцыямі кожнага дня масленічнага тыдня. Усе з задавальненнем удзельнічалі ў конкурсах на веданне прыкмет, прыказак і тэматычных прымавак, дзяліліся сямейнымі традыцыямі святкавання Масленіцы, рэцэптамі прыгатавання бліноў з сакрэтамі іх начынак.

Кіраўнік клуба Алена Сідарэнка зачытала кароткія ўрыўкі з твораў класікаў беларускай літаратуры, у якіх майстры слова дакладна апісваюць святочныя вячоркі беларусаў, перадаюць не толькі водар і смак страў на стале, але і павагу да іх, нацыянальны дух гасціннасці.

Сапраўдным творчым упрыгожваннем сустрэчы стаў удзел нашага славутага земляка — пісьменніка Мікалая Леўчанкі. У яго творчай скарбонцы знайшліся натхнёныя радкі, прысвечаныя Масленіцы і абуджэнню вясны. Акрамя таго, Мікалай Уладзіміравіч прадставіў падборку іншых жыццясцвярджальных вершаў, падарыўшы слухачам зарад аптымізму і душэўнага цяпла.

Усе прысутныя актыўна ўдзельнічалі ў кранальнай акцыі «Дрэва прабачэння», падчас якой яны літаральна ўдыхнулі жыццё ў выяву «сухога» дрэва, упрыгожыўшы яго галіны сваімі шчырымі словамі на зялёнай «лістоце». Такімі, напрыклад, як «Мір», «Каханне», «Выбачаю», што наглядна пераканала: добрыя словы заўсёды здольныя стварыць гэткі цуд.

Фіналам мерапрыемства стала чаяванне з дэгустацыяй бліноў, якія прыгатавалі бібліятэкары і самі ўдзельнікі клуба.

---