Міжнародны дзень роднай мовы
21 лютага ўвесь свет адзначае Міжнародны дзень роднай мовы. Гэта свята, абвешчанае 17 лістапада 1999 года на 30-й сесіі ЮНЕСКА, накіравана на заахвочванне моўнай разнастайнасці і шматмоўнай адукацыі, падтрымку нацыянальных моў і культур, захаванне нацыянальнай адметнасці і самабытнасці, забеспячэнне права кожнага чалавека карыстацца роднай мовай і спрыяе ўсведамленню моўных і культурных традыцый, якія грунтуюцца на ўзаемаразуменні, цярпімасці і дыялогу.
Да гэтай даты ў бібліятэках ДУК «Цэнтралізаваная бібліятэчная сетка Быхаўскага раёна» ладзіліся мерапрыемствы, накіраваныя на папулярызацыю беларускай мовы, выхаванне ў наведвальнікаў павагі і любові да роднага слова, цікавасці да твораў беларускіх пісьменнікаў.
Літаратурна-музычная кампазіцыя «І льецца мілагучнае слова, родная беларуская мова»
У чытальнай зале цэнтральнай раённай бібліятэцы імя Б.В. Стральцова ў рамках чарговага паседжання клуба па інтарэсах «Золотой возраст» адбылася літаратурна-музычная кампазіцыя «І льецца мілагучнае слова, родная беларуская мова», прысвечаная Міжнароднаму дню роднай мовы.
На мерапрыемства быў запрошаны наш знакаміты зямляк, пісьменнік, член Саюза пісьменнікаў Беларусі, заслужаны журналіст, Ганаровы грамадзянін Быхаўскага раёна і даўні добры сябар бібліятэцы Мікалай Уладзіміравіч Леўчанка. Разам з ім прыйшла жонка Тамара Андрэеўна, якая на працягу многіх гадоў з'яўляецца падтрымкай і галоўным натхняльнікам у ягонай творчасці. Мікалай Уладзіміравіч чытаў свае вершы, прысвечаныя роднай мове і радзіме. Дарэчы, прысутныя пачулі верш, які быў напісаны пісьменнікам спецыяльна да свята. Пасля чаго ўсе цалкам акунуліся ў чароўны свет роднай мовы. Бесперапынна гучалі песні, вершы, байкі, гумарэскі, нават невялікія казкі ў выкананні саміх удзельніц клуба. Таксама было прыемна чуваць добрыя, ласкавыя, шчырыя і захапляльныя словы ў адрас нашай роднай мовы. Усё гэта ў чарговы раз сведчыла аб багацці, разнастайнасці і непаўторнасці галоўнага нацыяналнага скарба беларусаў – мовы!
Інфармацыйная гадзіна «Да роднай мовы крок зрабі»
У ходзе інфармацыйнай гадзіны «Да роднай мовы крок зрабі», якая адбылася ў ДУА «СШ № 3 г. Быхава імя Н.Т. Маскалькова» бібліятэкар філіяла «Дзіцячая бібліятэка» зрабіла экскурс у гісторыю свята, вучні адгадвалі загадкі, складалі прыказкі і прымаўкі, удзельнічалі ў віктарыне. Асаблівую ўвагу бібліятэкар звярнула на кніжны развал, які раскрыў юным чытачам асаблівасці беларускай мовы і яе паходжання.
Літаратурна-пазнавальная гадзіна «Вытокі роднай мовы»
З мэтай папулярызацыі беларускай мовы ў школьнай бібліятэцы ДУА «СШ № 2 г. Быхава» для вучняў 11 класа прайшла літаратурна-пазнавальная гадзіна «Вытокі роднай мовы». Пачалося мерапрыемства з верша Ніла Гілевіча «Як ты дорага мне, мая родная мова», пасля чаго вядучыя расказалі аб тым, як беларуская мова праходзіла доўгі і складаны шлях развіцця, як узнікла беларускае кнігадрукаванне, аб важным значэнні мовы ў жыцці чалавека.
Далей падлеткі прачыталі вершы А. Грачанікава «Мова», А. Пысіна «Дала мне маці гэтую мову», А. Балуценкі «Мова Скарыны», прынялі ўдзел у турніры знаўцаў «Гучы, родная мова», конкурсах «Ведаем лексіку», «Правільны правапіс» і іншыя. Загадчык філіяла «Гарадская бібліятэка мікрараёна Колас» Алена Масцяркова зрабіла агляд твораў сучаснай беларускай літаратуры, азнаёміла са слоўнікамі і даведнікамі, якія маюцца ў бібліятэцы. У завяршэнні мерапрыемства прагучалі заключныя і важныя словы, што беларуская мова заслугоўвае таго, каб яе любілі, ганарыліся ёю і размаўлялі.
Вечар паэтычнага настрою «Беларускай мовы рысы непаўторныя»
Бібліятэкар філіяла «Палянінавіцкая сельская бібліятэка» правяла ў ДУА «Палянінавіцкая сярэдняя школа» вечар паэтычнага настрою «Беларускай мовы рысы непаўторныя». Прысутныя даведаліся, што 21 лютага ва ўсім свеце адзначаецца Міжнародны дзень роднай мовы, і чаму напэўна гэты дзень быў абраны да гэтай даты.
Затым удзельнікі з задавальненнем чыталі вершы на роднай мове: Ю. Свіркі «У нас сваiх хапае слоў», Н. Гілевіча «Як ты дорага мне, мая родная мова!», П. Броўкі «Калі ласка».
З лёгкасцю разгадвалі беларускія загадкі, успаміналі беларускія прыказкі і прымаўкі, прынялі ўдзел у конкурсах: «Перакладчыкі», «Знаўцы беларускага фальклору», «Пазнай слова», «Прадоўжы твор».
Адкрыты прагляд літаратуры «Жывая спадчына» пазнаёміў удзельнікаў з лепшымі творамі беларускай літаратуры – класікаў і сучасных аўтараў.
Літаратурна — музычная гасцёўня «Мелодыя беларускага слова»
З мэтай папулярызацыі беларускай мовы філіял «Гарадская бібліятэка мікрараёна Быхаў-1» сумесна з супрацоўнікамі Цэнтра культуры, народнай творчасці і рамёстваў арганізавалі і правялі для школьнікаў літаратурна-музычную гасцёўню «Мелодыя беларускага слова», прысвечаную Міжнароднаму дню роднай мовы.
Подробнее ...Інфармацыйны час «Гучы, роднае слова!»
У філіяле «Гадылёўская сельская бібліятэка» прайшоў інфармацыйны час «Гучы, роднае слова!». На мерапрыемстве бібліятэкар расказала вучням, што наша мова – частка чалавечай культуры, гістарычнай спадчыны, яна мае шматвяковую гісторыю, дзякуючы ёй, працягваюць жыць традыцыі нашага народа. Далей удзельнікі адказалі на пытанні віктарыны, перакладалі словы на беларускую мову, успомнілі прыказкі і прымаўкі. Напрыканцы мерапрыемства бібліятэкар параіла рабятам творы на беларускай мове для дзяцей.