У свеце вельмі многа розных моў, але толькі адна з іх – самая родная. Менавіта яна для чалавека надзвычай прыгожая, любімая, дарагая. І кожны год 21 лютага ў Міжнародны дзень роднай мовы людзі паўсюдна прызнаюцца ў любові да матчынага слова.

Так, напярэдадні гэтага свята супрацоўнікі бібліятэкі мікрараёна Колас правялі для вучняў 11 класа ДУА «СШ №2 г. Быхава» круглы стол «У чым каштоўнасць роднай мовы?». На актуальнае мерапрыемства запрасілі Мікалая Уладзіміравіча Леўчанку – члена Саюза пісьменнікаў Беларусі, заслужанага журналіста і Ганаровага грамадзяніна Быхаўскага раёна. Пачала мерапрыемства біблятэкар Алена Масцяркова з верша Пімена Панчанкі «Родная мова», затым паведаміла, колькі моў існуе ў свеце і чаму Міжнародны дзень роднай мовы адзначаецца менавіта 21 лютага. Далей вучаніцы 11 класа Лізавета Цыргановіч і Ганна Бабкунова прачыталі вершы Анатоля Грачанікава «Мова» і Максіма Танка «Родная мова».

Пасля гэтага Мікалай Леўчанка пераканаўча казаў вучням аб тым, што ім у спадчыну засталася ўнікальная мова – жывая і мілагучная, песенная і паэтычная, мова бацькоў і дзядоў, як найвялікшы нацыянальны скарб. Прачытаў вершы, прысвечаныя роднай мове, як свае новыя, так і раней напісаныя. Гэта вершы: «Аснова», «Каштоўнасць мовы», «Маладым беларусам» і іншыя.

Выпускнікі ўважліва слухалі аўтара і чытальніка, а напрыканцы мерапрыемства задавалі пытанні, атрымлівалі на іх адказы. Завяршылася мерапрыемства знаёмствам з тэматычнай выставай «Мова народа – яго святыня», на якую звярнула ўвагу бібліятэкар Алена Міхайлаўна.