У раённым цэнтры культуры супрацоўнікі цэнтральнай раённай бібліятэкі правялі літаратурны аўтограф «Вітаю вас ізноўку, землякі!..», прысвечаны 70-годдзю з дня нараджэння пісьменніка-земляка Міколы Леўчанкі. Вядучыя вялі гаворку аб жыцці і творчасці члена Саюза пісьменнікаў Беларусі, заслужанага журналіста Беларускага Саюза журналістаў, аўтара 9-ці зборнікаў паэзіі, прозы, дакументальна-мастацкай публіцыстыкі.

На мерапрыемстве прысутнічалі старшыня Быхаўскай раённай арганізацыі Беларускага грамадскага аб’яднання ветэранаў Міхаіл Зосімавіч Казлоў і добры сябар юбіляра Віктар Уладзіміравіч Сафонаў. В.У. Сафонаў шмат гадоў узначальваў Быхаўскую тыпаграфію, дзе друкавалася раённая газета, а Мікалай Уладзіміравіч доўгі час працаваў галоўным рэдактарам «Маяка Прыдняпроўя». Прысутныя з задавальненнем слухалі творы Міколы Леўчанкі, якія дэкламавалі ўдзельнікі мерапрыемства В. Власава і Е. Якаўлева. Ад імя супрацоўнікаў бібліятэк раёна словы віншавання юбіляру выказала намеснік дырэктара ДУК «Цэнтралізаваная бібліятэчная сетка Быхаўскага раёна» Наталля Чарняўская.