У раённым цэнтры культуры супрацоўнікі Быхаўскай цэнтральнай раённай бібліятэкі імя Б.В. Стральцова правялі вечар-партрэт «Ничего прошедшего не жаль», прысвечаны 100 –годдзю з дня нараджэння ўдзельніка Вялікай Айчыннай вайны, журналіста, заслужанага работніка культуры Беларусі, выдатніка друку краіны Георгія Ерамеевіча Барысава.

---

Георгій Ерамеевіч назаўсёды застаўся ў гісторыі нашага раёна. 32 гады ён працаваў рэдактарам Быхаўскай раённай газеты “Маяк Прыдняпроўя”. Разам са сваім асноўным заняткам вёў вялікую краязнаўчую працу, збіраў матэрыял па ўвекавечванню памяці славутых жыхароў Быхаўшчыны. Па ініцыятыве і пры актыўным удзеле Барысава быў створаны раённы гісторыка-краязнаўчы музей, Мемарыял славы на Лудчыцкай вышыні, Курган Бяссмерця ў вёсцы Дабужа і іншыя помнікі Народнай Славы. Георгій Барысаў лічыцца збіральнікам матэрыялу для гісторыка-дакументальнай кнігі “Памяць. Быхаўскі раён”.

Бібліятэкар Аксана Дрозд пазнаёміла прысутных з ваеннай, працоўнай і творчай біяграфіяй Георгія Ерамеевіча, якая вельмі багатая цікавымі фактамі.

На мерапрыемства запрасілі пісьменніка, члена Саюза пісьменнікаў Беларусі, заслужанага журналіста, выдатніка друку Беларусі, Ганаровага грамадзяніна Быхаўскага раёна Мікалая Уладзіміравіча Леўчанку, ветэрана працы, тагачаснага дырэктара друкарні, дзе многія гады друкавалася газета “Маяк Прыдняпроўя”, Віктара Уладзіміравіча Сафонава, старшыню раённага Савета ветэранаў Міхася Зосімавіча Казлова. Яны падзяліліся сваімі ўспамінамі аб гэтым выдатным чалавеку, дзякуючы якім атрымаўся сапраўды жывы партрэт Георгія Ерамеевіча.

---