Дзень работнікаў сельскай гаспадаркі і перапрацоўчай прамысловасці аграпрамысловага комплексу
У раённым цэнтры культуры ў рамках урачыстага мерапрыемства, прысвечанага Дню работнікаў сельскай гаспадаркі і перапрацоўчай прамысловасці аграпрамысловага комплексу супрацоўнікі цэнтральнай раённай бібліятэкі імя Б.В. Стральцова аформілі літаратурна-этнаграфічную экспазіцыю «Да вытокаў народнай культуры».
Беларусы заўжды ўмелі працаваць, пасля чаго добра адпачыць, а які адпачынак без смачнай ежы. Беларуская кухня мае даўнюю гісторыю. Характэрныя рысы самабытных страў, якія дайшлі да нас з глыбіні стагоддзяў, вылучаюць нашу нацыянальную кухню сярод іншых краін, надаюць ёй своеасаблівы каларыт і непаўторнасць. І сёння, стравы, што калісьці былі неад’емнай часткай штодзённага побыту нашых продкаў, вяртаюцца ў нашу свядомасць і за нашы сталы. Менавіта гэтаму была прысвечана выстава «Багацце беларускай кухні».
У мінулым падчас святкавання розных свят, а іх было немала, нашымі продкамі вялікая значнасць надавалася абрадавай ежы. Прыгатаванне такіх страў насіла рытуальна-сакральны характар. Падрабязна аб гэтым расскажуць кнігі пра святы і абрады беларусаў. Ну і як жа без хлеба. Хлеб таксама традыцыйная ежа беларусаў. Спрадвеку хлеб у нашай краіне быў у пашане і з’яўляецца знакам заможнасці, дабрабыту і дастатку. І па сённяшні дзень захоўваецца традыцыя сустракаць гасцей хлебам-соллю, што сведчыць пра гасціннасць, ветлівасць і адкрытасць гаспадароў. Нездарма ў народзе гавораць: будзе хлеб, будзе і песня.
Яшчэ з дапамогі выставы паспрабавалі паказаць, якія стравы беларускай кухні знайшлі адлюстраванне ў мастацкіх творах усім вядомых беларускіх класікаў. Гэта «Зямля пад белымі крыламі» Караткевіча, якая ўяўляе сабой сапраўднае падарожжа па Беларусі здзейсненае самім аўтарам, які зведаў амаль кожны яе куточак, пабачыў ўсё на ўласныя вочы. «Новая зямля» Якуба Коласа. Яе ўвогуле лічуць энцыклапедыяй кухні беларускага народу. Паэт не раз піша, як снедалі, абедалі, частаваліся яго героі ў будні і святы. Лічыцца, што дастаткова прачытаць толькі адну гэту паэму – і даведаешся амаль пра ўсе беларускія стравы.
Наведвальнікі пляцоўкі з задавальненнем прымалі ўдзел у гульне «Знаўцы беларускай кухні» ў якой спачатку адгадвалі, а пасля спрабавалі «згатаваць» традыцыйныя нацыянальныя беларускія стравы.
