У рамках святкавання дваццатай гадавіны Канвенцыі аб ахове нематэрыяльнай культурнай спадчыны ААН у чытальнай зале Быхаўскай цэнтральнай раённай бібліятэкі імя Б.В. Стральцова для бібліятэкараў і работнікаў раённага цэнтра культуры адбылася гадзіна пазнання «Край беларускі, край самабытны».

---

Наш родны край – гэта Беларусь, самая прыгожая, і спадзяемся, самая любая краіна. А ці ведаем мы па сапраўднаму сваю краіну? Яе гісторыю, знакамітых людзей, яе выдатныя мясціны, мову. Зразумела, што пэўныя веды аб Беларусі ва ўсіх у нас канешне ёсць. Таму, з дапамогай мерапрыемства прысутныя змаглі праверыць і паглыбіць свае веды.

Вядучыя распавялі аб тым, якую значнасць у старажытнасці пакаленні беларусаў надавалі арнаменту. Менавіта дзякуючы старадаўнім тканым і вышываным вырабам, якія захаваліся да нашага часу, магчыма пачуць галасы сваіх продкаў, даведацца, пра што думалі і пра што марылі, што яны любілі, чаго баяліся, каго паважалі і што хацелі б расказаць нам, сваім нашчадкам.

Увогуле, мы – адзіная нацыя, якая здолела захаваць першапачатковы выгляд свайго арнаменту. Калегі даведаліся пра іншыя асабліваці нацыянальнага узору, знаёміліся са шматлікімі абярэгамі беларусаў, што і дае магчымасць вылучыць нас сярод іншых народаў.

Узгадалі яшчэ адну рэч, якая таксама з’яўляюцца сапраўдным гонарам Беларусі, сусветна прызнаным дасягненнем яе шматвяковай культуры. Гэта слуцкія паясы — вырабы ткацкай мануфактуры, якая працавала ў Слуцку ў другой палове XVIII - пачатку XIX стагоддзя. Яны па праве лічацца найбуйнейшым здабыткам айчыннага і еўрапейскага дэкаратыўна-прыкладнога мастацтва.

---