21 лютага адзначаецца Міжнародны дзень роднай мовы. Гэты дзень асаблівы для кожнай нацыі, кожнага народа, бо няма народа без мовы, няма мовы без яго носьбіта.

19 лютага ў цэнтральнай раённай бібліятэцы адбыўся Дзень інфармацыі «Слова роднае – вечнасці след». На працягу дня наведвальнікі бібліятэкі знаёміліся з кнігамі, часопісамі на беларускай мове і даведаліся шмат цікавага пра родную мову.

Для работнікаў ДУК «ЦКС Быхаўскага раёна» была праведзена прэзентацыя часопіса «Роднае слова», на якой адбылося знаёмства з выданнем, а таксама было расказана пра магчымасці выкарыстання часопіса работнікамі клубных устаноў у сваёй рабоце.

На абанеменце быў праведзены агляд выставы «Новыя кнігі беларускіх пісьменнікаў», які выклікаў у чытачоў цікавасць і жаданне пазнаёміцца з творчасцю сучасных беларускіх пісьменнікаў.

У чытальнай зале аформлена выстава «Па-беларуску слухаць і чытаць – мову нашу спасцігаць». На ёй былі прадстаўлены кнігі, па якіх можна вучыць беларускую мову, а таксама творы беларускай літаратуры ў аўдыяфармаце.

Для навучэнцаў 10 класа ДУА «Сярэдняя школа № 1 г. Быхава» быў праведзены турнір знаўцаў «Родная мова, цудоўная мова», на якім рабятам былі прапанаваны самыя розныя пытанні – і жартоўныя, і сур’ёзныя.

Спадзяемся атрыманая інфармацыя дапамагла нашым чытачам яшчэ больш любіць і шанаваць родную мову.