8 лютага спаўняецца 100 год з дня нараджэння народнага пісьменніка Беларусі – Івана Паўлавіча Мележа.

Іван Мележ – найвялікшы беларускі пісьменнік і публіцыст, лаўрэат шматлікіх літаратурных прэмій, удзельнік ваенных дзеянняў у Вялікай Айчыннай вайне. Узнагароджаны двума ордэнамі Працоўнага Чырвонага Сцяга, ордэнамі Чырвонай Зоркі, «Знакам Пашаны» і медалямі.

Пасля смерці ён пакінуў нашчадкам вялікую літаратурную спадчыну. Ключавое месца ва ўсёй творчасці Мележа займае трылогія «Палеская хроніка»: «Людзі на балоце», «Подых навальніцы», «Завеі. Снежань». Яго раман «Мінскі напрамак», п’есы «Пакуль вы маладыя», «Дні нашага нараджэння» і кожны са зборнікаў апавяданняў і аповесцей «У завіруху», «Гарачы жнівень», «Блізкае і далёкае», «Што ён за чалавек», «Белыя вішні і яблыні» і іншыя – адразу ж пасля з’яўлення на свет станавіліся сапраўднай з’явай беларускай нацыянальнай літаратуры.

У сувязі з святкаваннем дня нараджэння пісьменніка, у бібліятэках ДУК «Цэнтралізаваная бібліятэчная сетка Быхаўскага раёна» будуць аформлены выставы літаратурнай спадчыны аўтара: персанальная выстава «Тварэц праўдзівага жыцця» у цэнтральнай раённай бібліятэцы імя Б.В. Стральцова, юбілейныя выставы «Кніжная спадчына І. Мележа» у раённай дзіцячай бібліятэцы, «Святло душы і таленту» у бібліятэцы мікрараёна Колас, выстава-партрэт «Летапісец непрыдуманай праўды» у Чарнаборскай сельскай бібліятэцы і інш. На сайце бібліятэкі мікрараёна Быхаў-1 будзе дзейнічаць віртуальная выстава «Пясняр Палесся». Пройдзе таксама і шэраг мерапрыемстваў, прымеркаваных да 100-годдзя з дня нараджэння Івана Мележа.

План правядзення мерапрыемстваў, прысвечаных да 100-годдзя Івана Мележа